FILOSOFÍA PARA VERANEANTES

A filosofía ten sona de cousa sisuda, de abstraccións non doadas de entender. O verán é tempo de lecer e vagar que pide, seica, ocupacións lixeiras para pasar o tempo sen raiar os miolos, abusando dun verbo de uso popular entre a xente nova. Non parecen, de primeiras, dous espazos –o da filosofía e o do verán- que se vaian levar ben. Nós queremos demostrar que iso non ten por que ser así. En Filosofía para Veraneantes convocamos a quen queira acompañarnos a repensar as cinco grandes ideas do pensar clásico: Deus, Verdade, Ben, Xustiza, Beleza. Sen pretensións académicas ou eruditas. Só coa intención de descubrir o que hai nelas (se algo hai aínda), non de fósil antigo inservible, senón de actualidade viva. Ou mellor: o que debería haber porque, se cadra, o esquecemento de algunha desas ideas, que é o esquecemento do pensar filosófico, forma parte de certas malas inclinacións da nosa contemporaneidade ás que cumpriría resistirse. Mesmo durante o verán. Un pensar filosófico, o que propoñemos, que fuxe de tentacións herméticas ou de fórmulas exclusivas para iniciados. Porque a filosofía é e debe ser un pensar de tod@s. Tamén dos veraneantes.

Filosofía para Veraneantes desenvolverase en cinco sesións ao longo de dúas semanas. Cada sesión terá un relator que fará unha exposición de non máis de 35 minutos, despois da cal abrirase un debate que, en calquera caso, non se deberá prolongar máis alá dos 55 minutos.

SE ESTÁS INTERESAD@ NON DUBIDES EN MATRICULARTE:

Os encontros son de balde previa inscrición. Para inscribirte envía un correo a ucv_cm@hotmail.com co teu nome e DNI.